English | عربي



مایك پۆمپیۆ لە جیهانی سیخوڕییەوە بۆ وەزیری دەرەوە

2018/03/14 | 19:35

هەواڵی کوردستان - لایەنگری ئیسلامۆفۆبیا و گوانتانامۆ و ئیسرائیلە

دوێنێ‌ سێشەممە دۆناڵد ترەمپ سەرۆكی ئەمریكا لە هەنگاوێكی چاوەڕوانەكراودا مایك پۆمپیۆ بەڕێوەبەری ئاژانسی هەواڵگریی ناوەندی (CIA) وەك وەزیری دەرەوەی ئەمریكا دەستنیشان كرد.

وەزیری نوێی دەرەوەی ئەمریكا "تەمەن 54 ساڵ" لە 30ی مانگی كانوونی یەكەمی ساڵی 1963 لە شاری ئۆرانج سەر بە ویلایەتی كالیفۆرنیا باشووری رۆژئاوای ئەو وڵاتە لەدایك بووە.

ئەفسەری هەواڵگری و سیاسییە، سەر بە كۆمارییەكانە، بە داڵەكانی ئیدارەی ترەمپ لە قەڵەم دەدرێت كە لە 20ی كانوونی دووەمی ساڵی 2017دا بوو بە بەڕێوەبەری ئاژانسی هەواڵگریی ناوەندی ئەمریكا (CIA).

مایك پۆمپیۆ لە ساڵی 1986 بۆ ساڵی 1991 دەستی بە خزمەتكردن لە سوپای ئەمریكادا كردووە و دواتر لە ساڵی 1994دا چووەتە كۆلێژی یاسا لە زانکۆی هارفارد و دوای دەرچوونی دەستی بە كاری پارێزەری لە كۆمپانیای ویلیامز ئاند كۆنۆلی بۆ پارێزەران كردووە.

لە ساڵی 1998، مایك پۆمپیۆ دەستی بە كاركردن لە بواری وەبەرهێنان كردووە و كۆمپانیای سایر ئەبرۆسپێسی دامەزراندووە و دواتر لە هەڵبژاردنەكانی ساڵانی نێوان 2011 و 2017 بە ئەندامی ئەنجوومەنی نوێنەران لەسەر ویلایەتی كەنساس هەڵبژێردرابوو.

لە شوباتی 2017دا، مایك پۆمپیۆ بە جیا سەردانی توركیا و سعوودیەی كردبوو، هەروەها چاوی بە محەمەد بن نایف جێنشینی پێشووی سعوودیە كەوتبوو.

مایك پۆمپیۆ بەتایبەت چەند هەڵوێستێكی سیاسی هەبووە، لەوانە، لە گوتارێكدا ساڵی 2013 كە رۆژنامەی (The Hill) بڵاوی كردبووەوە، رایگەیاندبوو "سەركردەكانی موسڵمانان كە ئیدانەی كردە تیرۆریستییەكان كە بە ناوی ئیسلامەوە ئەنجام دەدرێن ناكەن، لەوانەیە لەو هێرشانە تێوەگلابن".

پۆمپیۆ گوتبووی "زۆربەی ئەو هێرشە تیرۆریستانەی لە 20 ساڵی رابردوودا ویلایەتە یەكگرتووەكان بە خۆیەوە بینویەتی، لە لایەن ژمارەیەك كەسەوە ئەنجام دراون، كە سەر بە یەك ئایینن و بە ناوی ئەو ئایینەوە ئەنجام دراون، بۆیە پێویستە لەسەر سەركردەكانی موسڵمانان ئەوە رابگەیەنن كە هیچ پاساوێك بۆ تیرۆر نییە و زانایانی ئایینی ئیسلام كردەوە تیرۆریستییەكان ئیدانە بكەن".

لە هەڵوێستێكی تردا، مایك پۆمپیۆ لە میانی سەردانێكی بۆ ئیسرائیل كە لە مانگی كانوونی دووەمی ساڵی 2015 ئەنجامی دابوو، رایگەیاندبوو بێنیامین ناتانیاهو سەرۆك وەزیرانی ئیسرائیل هاوبەشێكی راستەقینەی گەلی ئەمریكایە.

لەبارەی ئێرانیشەوە، مایك پۆمپیۆ رێككەوتنی ئەتۆمی كە لە نێوان ئێران و وڵاتانی (5+1) لە ساڵی 2015دا واژوو كراوە، رەت كردبووەوە و بە كارەسات وەسفی كردبوو.

لەلایەكی ترەوە مایك پۆمپیۆ داخستنی گرتووخانەی گوانتانامۆی رەت كردووەتەوە، هەروەها رەخنەی لە هەمبەر بڕیاری داخستنی گرتووخانە نهێنییەكان كە لەلایەن هەواڵگریی ئەمریكا لە دەرەوە بەڕێوە دەبرێن رەخنەی لە ئیدارەی سەرۆكی پێشووی ئەمریكا گرتبوو.










زۆرترین بینراو


هەواڵی سەرەکی

⋙ ب وێنه‌: ئاهه‌نگا ده‌رچوونا گه‌را 23ێ يا زانكۆيا دهۆك

⋙ بەشێک لە پێشمەرگە دیلەکان لە زیندانەکانی حەشدی شەعبین

⋙ ئەمەریكا دەیان بەرپرس و دامەزراوەی روسیا دەخاتە لیستی سزاكانییەوە

⋙ "سەركردایەتیی كورد دژی بە ھەرێم كردنی كەركوك نەبوون" نەجمەدین كەریم: دوای 16ی ئۆكتۆبەر هیچ پەیوەندییەكم بە یەكێتییەوە نەماوە

⋙ ب ڤيديۆ: ئاهه‌نگا ده‌رچوونا گه‌را 23ێ يا زانكۆيا دهۆك

ڤیدیۆ هەواڵ
⋙ ڤیدیۆی گۆڵ : چێڵسی ١-٠ پاوک

⋙ ڤیدیۆ؛ چێڵسی بەسەرکەوتن یورۆپالیگی دەستپێکرد


زۆرترین بینراو